RSS

Monthly Archives: June 2014

காம அரசியல், காமத்தின் அரசியல், காமமே அரசியல்

10354661_10204189397284716_5568686845516892293_nசற்றே நீளமான கட்டுரைக்காக முதலில் நண்பர்களிடம் மன்னிப்பு கேட்டு விடுகிறேன். இந்தக் கட்டுரையை எழுத தனிப்பட்ட காரணங்கள் எதுவுமில்லை. காமமானது அரசியலாக எப்போது உருவாக ஆரம்பித்தது என ‘ரூம் போட்டு யோசித்தபோது’ தோன்றிய விஷயங்களை வைத்து நண்பர்களுடன் உரையாடலாம் என்று தோன்றியது. அதனால்தான் இந்தக் கட்டுரை. மற்றபடி எதுவுமே இறுதி முடிவல்ல என்பது இதற்கும் பொருந்தும்.

உடலை குறித்து அறிய நிர்பந்திக்கப்பட்ட போதே காமம் குறித்த அரசியலும் என் மீது திணிக்கப்பட்டு விட்டது. 1990களில் வெளியான ‘கர்நாடகமுரசும் நவீன தமிழ் இலக்கியத்தின் மீதான ஒரு அமைப்பியல் ஆய்வும்’ என்ற நான் லீனியர் சிறுகதை தொகுப்பும், அதில் நாகார்ஜுனன் மொழிபெயர்த்திருந்த ஃபூக்கோவின் தன் நேர்காணலும் (வ்வாழ்வைத் தாண்டிய சொல்லாடல்) மாற்று உரையாடலை நோக்கி நகர்த்தின.

பாலியல் நடத்தையும், அதைச் சார்ந்த செயல்பாடுகளும், சுகங்களும் ஏன் ஒழுக்கவியல் விசாரணைக்குரிய பொருட்களாயின? இதற்கு ஏன் இத்தனை அறவியல் கவலை? எப்போது, எவ்வாறு, ஏன், இந்த பாலியல் வடிவங்கள் ஓர் ஒழுக்கவியல் மையமாக கட்டப்பட்டன? இதை ஏன் பிரச்னை மையமாக பார்க்க வேண்டும்? எப்போது முதல் இந்தவகையான பார்வை ஆரம்பித்தது?

  • பின் தொடரும் இந்த கேள்விகளுக்கான விடையை தேடி பயணித்ததில், எட்டுத் தொகையும், பத்துப்பாட்டும் வரை செல்ல முடிந்தது. அதாவது கி. மு. 3ம் நூற்றாண்டு முதல், கி. பி. 2ம் நூற்றாண்டு வரையான 5 நூற்றாண்டுகள். அதற்கு முந்தைய காலம் குறித்த பிரதி இல்லை என்பதால் எட்டுத் தொகை, பத்துப்பாட்டை வைத்து அதற்கு முன்னால் இருந்த சூழலையும், அந்த கால கட்டத்தையும், அதற்கு பின்னால் வரக் கூடிய காலகட்டத்தின் கூறுகளையும் – அறிய முடிகிறது.

    அப்படி பார்க்கும்போது தமிழனாகவும், தமிழ் நிலப்பரப்பை சேர்ந்தவனாகவும் அடையாளம் காணப்படும் என் காமத்தின் ஆதி எப்படி இருந்தது?

    இதை குறித்து தெரிந்து கொள்ள முயலும்போதே, ஆதிதமிழர்களின் உடல்கள் நடமாடிய நிலப்பரப்பு குறித்தும் பார்த்துவிடுவது மேலதிக புரிதலுக்கு வழிவகுக்கும். எந்தப் பொருளுமே புறப் பொருளின் தூண்டுதல், அல்லது மோதலால் மாற்றமடைகிறது அல்லது உருமாறுகிறது என்னும்போது எட்டுத் தொகையும், பத்துப்பாட்டும் உற்பத்தியான காலகட்டத்தில் இருந்த புறப் பொருட்கள் என்னென்ன?

    வடவேங்கடம், தென்குமரி, குட (மேற்கு) கடல், குண (கிழக்கு) கடல் ஆகிய நான்கு எல்லைகளுக்குள் இருந்த நிலப்பரப்பில் அப்போது தமிழர்கள் வாழ்ந்திருக்கிறார்கள். அவர்களின் சம காலத்திலும், அதற்கு முன்னரும் – பின்னரும் வடக்கே இமயத்தை எல்லையாகக் கொண்ட, வற்றாத ஜீவநதிகள் பாயும் நிலப்பரப்பில், பல்வேறு குடிமக்கள் இருந்திருக்கிறார்கள்.

    அதாவது…. தமிழகத்தில் பல்வேறு பூர்வகுடிகளும், திணைநிலைக் குடிகளும், தலைவர்கள் – சிற்றரசர்கள் – வள்ளல்கள் – வேளிர்கள் – மலை / கடல் / காடு ஆகிய பகுதிகளில் தலையெடுத்த மன்னர்களும் –

    இவர்களை ஆயுதத்தாலும், அரசியல் சூழ்ச்சியாலும், ‘யாதும் ஊரே யாவரும் கேளிர்’ என்னும் கருத்தியல் அதிகாரத்தாலும் தங்கள் மேலாதிக்கத்துக்குள் கொண்டு வந்த மூவேந்தர்களும் வாழ்ந்த இந்த 5 நூற்றாண்டுகள் காலத்தில் – அதாவது கி. மு. 3ம் நூற்றாண்டு முதல், கி. பி. 2ம் நூற்றாண்டு வரையான காலகட்டத்தில் –

    வடக்கே மகப் பேரரசு மறைந்து மவுரியப் பேரரசு உருவாகி ரோமப் பேரரசோடு அரசியல் – வர்த்தக தொடர்பு கொண்டிருந்தது. ‘வம்பமோரியர்’ என அந்தக் கால தமிழ்ப்புலவர்களால் மவுரியர்கள் குறிப்பிடப்பட்டிருக்கிறார்கள். வடநாட்டு அரசர்கள் பொதுவாக ‘வட ஆரியர்’ என அடையாளப்படுத்தப்பட, வேங்கடத்துக்கு வடக்கே இருந்த மக்கள் ‘கதநாய் வடுகர்’, ‘நீள் மொழி வடுகர்’ என அழைக்கப்பட்டிருக்கிறார்கள்.

    சமணத்தையும் (சந்திரகுபத மவுரியன்), பவுத்தத்தையும் (அசோகன்) ஆதரித்த மவுரியப் பேரரசுக் காலம் கி. மு. 2ம் நூற்றாண்டோடு முடிவுக்கு வந்தது. அதன் பின் சுங்க வம்சத்தை சேர்ந்த புஷ்யமித்திரன் என்ற பிராமண மன்னனோடு வைதீக – மனுதர்ம காலகட்டம் தோன்றியது. சங்ககால தமிழகத்தை குறித்து உரையாடும்போது இந்தப் புள்ளியை நினைவில் கொள்வது நல்லது. அதேபோல் புஷ்யமித்திரனுக்கு முன்பு வரை ஆந்திரமும், இலங்கையும் சமண, பவுத்த மையங்களாக இருந்ததையும், தமிழகத்தில் இவை அறிமுகமாகியிருந்தன என்பதையும் உணர்வது பல புரிதலுக்கு வழிவகுக்கும்.

    எனவே இந்த 5 நூற்றாண்டு காலத்தில் தமிழகம் தனித்தீவாக இல்லை. சுற்றிலும் மக்கள் இருந்திருக்கிறார்கள். மேற்கிலிருந்து யவனர்கள் வந்து தமிழகத்தில் வாணிபம் புரிந்திருக்கிறார்கள். கடல் வழி, தரை வழி தொடர்புகள் பல நாடுகளுடன் இருந்திருக்கின்றன. அதனால் எட்டுத்தொகை, பத்துப்பாட்டு ஆகிய சங்ககால பாடல்களில் தமிழ் நாகரீகத்தின் அப்பட்டமான சுய சிந்தனைகள் மட்டுமே இல்லை. கூடவே வேறு நிலப்பரப்பை சேர்ந்த புதிய சிந்தனைகளும் கலந்திருக்கக் கூடும்.

    இப்போது சங்ககால பாடல்களுக்கு வருவோம். பாலியலை இயற்கையான தூண்டுதலாக தமிழர்கள் நோக்கியிருக்கிறார்கள் என்பது எட்டுத் தொகையையும், பத்துப்பாட்டையும் வாசிக்கும்போது புரிகிறது. அதனை தீயது, பாவம், அசிங்கம் என்று ஒதுக்கும் போக்கு அன்று இல்லை. ஆனால், அப்படியான ஒரு பார்வை பின்னாளில் வருவதற்கான அடையாளங்களையும் அது தன்னகத்தே கொண்டிருந்தது என்பதையும் மறுப்பதற்கில்லை.

    மனைவியோடு வாழும் கணவன், மனைவிக்கு விசுவாசமாக நடந்து கொள்ள வேண்டும் என்ற சட்டமோ, வழக்கோ காணப்படவில்லை. காதலியை நினைத்து காதலன் உருகுவது, ஏங்குவது, தவிப்பது எல்லாம் அந்தப் பிரதிகளில் காணப்படுகின்றன. ஆனால், ஒரு கணவனான பிறகு இந்த உணர்வுகள் பெரிதும் இல்லை என்பதையும் அதே பிரதிகள் சுட்டிக் காட்டுகின்றன.

    கூடல், இருத்தல், இரங்கல், பிரிதல், ஊடல் என்ற பாலியல் உறவுகளின் உணர்வுகள் எல்லாம் பெண்ணை சார்ந்தவையாக கூறப்பட்டுள்ளன. அதாவது பெண்ணின் நோக்கிலிருந்து பாலியல் விளக்கப்பட்டது என்றும் இதை கூறலாம். அதே நேரம், தனியுடமையின் உருவாக்கமும், சொத்துரிமையின் ஆரம்பமும், அதை கட்டிக் காப்பதற்கான முடியாட்சி அரசியல் வளரும் காலமும், அதே சங்ககாலமாக இருந்ததால், பழைய குழு வாழ்வின் இணக்கத்திலிருந்து விடுபடும் நிலையை நோக்கி ஆண் நகர வேண்டிய தேவை ஏற்பட்டது. அதனால்தான் பொருள் தேடி புறப்பட்டான். போர் செய்ய கிளம்பினான். இவையெல்லாம் வேண்டாம். பழைய குழு வாழ்வின் இணக்கத்துக்கு திரும்புவோம் என பெண் அவனை அழைத்தாள். அப்போது தனது வேட்கையை கட்டுப்படுத்துவதுடன், பெண்ணின் வேட்கையையும் கட்டுப்படுத்தும் நிலைக்கு ஆண் தள்ளப்பட்டான். அதாவது பெண்ணிடம் அதிகாரம் செலுத்த ஆரம்பித்தான்.

    ஆனாலும் தவம், விரதம், நோன்பு ஆகிய பாலியல் துறவின் வடிவங்கள் அன்று கற்பிக்கப்படவில்லை. அதை கடைப்பிடித்த ஒரு சிலரும் வைதீக – அவைதீக மரபினரே.

    பெண்ணின் பாலியல் ஒழுக்கம் ஆணை சார்ந்து, அவனால் இயக்கப்படுவதாக இருந்தது. ஆணின் பாலியல் ஒழுக்கம் அவனைப் பொருத்தவரை ஒரு சொகுசு. விலை மகளிருடன் செல்லவும், கூடவும், வாழவும் அவனுக்கு உரிமை இருந்தது. ஆனால், ‘விலை ஆணுடன்’ செல்ல பெண் அனுமதிக்கப்படவில்லை! அப்படிப்பட்ட ‘விலை ஆணும்’ அன்று இருந்ததாக தெரியவில்லை.

    சரி, பிரதிக்கு வருவோம். புணர்ச்சி செயல், அதன் களிப்பு, ஆசை ஆகியவற்றை வேறு வேறாக பிரிக்காத புலவர் மரபு அன்று இருந்திருக்கிறது. அதனால்தான், வேறு வேறாக பிரிக்க ஆரம்பித்த பின், அதாவது சங்க காலத்துக்கு பின், பாலியல் குறித்த எண்ணம் – சதை குறித்த, ஒழுக்கத்துக்கு உரிய ஓர் அடிப்படை கூறாக மாறியிருக்கிறது.

    ஒரு செயலைச் செய்யும் காரியத்தோடு ஒரு சுகத்தை இணைப்பது இயற்கையின் நோக்கம். இந்த சுகம்தான் ஆசைக்கு வழிவகுத்தது. ஆனால், புணர்ச்சி செயலையும், அதனால் உண்டாகும் களிப்பையும், ஆசையையும் ஒரு முழுமையிலிருந்து (அளவுக்கு மீறாமல் அளவுடன் இயங்குவது) பிரித்துவிடும்போது, புணர்ச்சிச் செயலில் உண்டாகும் சுகமும், ஆசையும், நன்மை – தீமை என்ற மதிப்பீட்டு சிக்கலுக்கு உள்ளாகிறது. அதாவது பாலியல் நடத்தையிலுள்ள புணர்ச்சி செயல், ஆசை, சுகம், ஆகியவை ஒழுக்கவியலுக்கான பொருட்கள் இல்லை. இந்த மூன்றும் இணைந்த ஒரு இயக்கமே பாலியல் நடத்தையின் இலக்கு.

    அதனால்தான் சங்க கால புலவர் மரபு, எந்த ஆசைகள், எந்தவிதமான செயல்கள், எந்தவிதமான சுகங்கள் சரியானவை அல்லது தவறானவை என பார்க்கவில்லை. பதிலாக இந்த ஆசைகளும், சுகங்களும் ஒருவரை என்னவாக உருமாற்றுகின்றன என்று பார்த்தது. சுருக்கமாக சொல்வதென்றால் பாலியல் செயலின் பண்பை பார்க்காமல், அந்தச் செயலின் அளவை பார்த்தது.

    ஐந்திணை உரிப்பொருள்களில் பாலுறவின் வகைகள், முறைகள் குறித்து பேச்சில்லை. நிலைகளே புலவர் மரபுக்கு உரியதாக இருந்தன. களவு உறவில் ஏக்கம், தவிப்பு, ஏமாற்றம், நிச்சயமற்ற தன்மை, மணத்துக்கு வற்புறுத்துவது, சூள் உரைப்பது, இரவு – பகலாக சேரத் துடிப்பது, சந்திப்புக்கு வாய்த்த இடையூறுகள், உணவு செல்லாமை, தூக்கம் கொள்லாமை, உடல் மெலிவு, பசலை, பெற்றோரின் தடை, பொருள் இல்லாமை, மணம் தள்ளிப் போதல், ஊரார் கண்காணிப்பு, புலம்பல், தூது விடல், காமம் மிக்க கழிபடர் கூறல்… ஆகிய சந்தர்ப்பங்களும், உணர்ச்சி வெளிப்பாடுகளும்தான் விவரிக்கப்பட்டுள்ளன. அதாவது பாலுறவுச் செயல் மூடி மறைக்கப்பட்டு அதன் உணர்ச்சி மற்றும் மெய்ப்பாட்டுச் செயல்களே விளக்கப்பட்டுள்ளன.

    இயல்பான காமம், மாற்றுப் பாலுடன் இணைந்து இன்பம் அனுபவிக்க முடியாமல் போகும்போதே அது நோயாகிறது… ‘இடும்பை நோய்'(குறுந்தொகை:217), ‘துஞ்சா நோய்'(குறு:242), அதனை அறிவுடையோர் நெருங்கமாட்டார் (குறு: 206)… முதலிய ஆற்றாமைகள் எழுகின்றன. ‘காமம் கைம்மிகின் தாங்குதல் எளிதோ'(நற்றினை: 39) என்று அளவு மீறுகிறபோதுதான் காமம் பிரச்னைக்குரியதாக மாறுவதாக புலவர் மரபு குறிப்பிடுகிறது.

    ஆனால், அதே சங்க காலத்தில் ஊற்றெடுக்க ஆரம்பித்து, பிறகு வந்த காலகட்டத்தில் வெள்ளமாக பெருக்கெடுத்த காமத்தை கட்டுப்படுத்தல், மட்டுப்படுத்தல் ஆகிய பெருங்கதையாடல்கள் காமத்தின் அரசியலை வடிவமைக்க ஆரம்பித்தன.

    உடல்ரீதியான பாலியல் அனுபவம், ஆணுக்கும் பெண்ணுக்கும் பொதுவானதுதான். ஆனால், அது நிகழ்த்துபவர் – நிகழ்த்தப்படுவது என்ற வேறுபாடான செயல்களை பொறுத்து இரு பாலினருக்கும் வேறு வேறாக ஏற்படுகிறது. இந்த வேறுபாடே ஏனைய தளங்களில், ஆணுக்கு ஆளும் பாத்திரத்தையும், பெண்ணுக்கு ஆளப்படும் பாத்திரத்தையும் ஏற்படுத்தியது.

    அதாவது பாலியலை கட்டுப்படுத்துவது ஞானத்துக்கு வழிவகுக்கும் என்பதாக மாறிப்போனது. பாலியல் சுகத்தை தனது கட்டுப்பாட்டுக்குள் கொண்டு வருவதிலிருந்து – அதாவது காமத்தை ஆளும் ஆணின் சுய எஜமானத்துவத்திலிருந்து – பிறரை, பெண்ணை, நாட்டை ஆளுகின்ற ஆதிக்க நிலை அவனுக்கு கிட்டியது.

    தன்னையே ஆளுதல், தனது நிலத்தை உழுவித்தல், நாட்டு நகர நிர்வாகத்தில் ஈடுபதல் ஆகிய மூன்று செயல்பாடுகளும் ஒரேவகையை சேர்ந்ததே. இது பாலியலை கட்டுப்படுத்துவதிலிருந்தே தொடங்குகிறது. இதன் நீட்சியாகத்தான் ஆண் – பெண் உறவு, ஆள்பவன் – ஆளப்படுபவர் என்ற உறவாக கட்டமைந்து ‘அரசியலாக’ மாறிப் போனது.

    ஆண் தனது பாலியல் உந்துதலை அடக்கி ஆளும்போது தனது ஆதிக்கம், அதிகாரம், செல்வாக்கு அதிகரிப்பதை உணர்கிறான். இப்படியாக வீட்டில் அவன் மேற்கொள்கிற இந்த ஒழுங்கு முறைப் பயிற்சியிலிருந்து நாட்டை ஆளும் அதிகாரம் அவனுக்கு வர தொடங்கியது.

    இதே சங்க காலத்தில் காமம் குறித்த வேறு பார்வைகளும் தலை தூக்க ஆரம்பித்துவிட்டன என்பதற்கான உதாரணங்களும் இருக்கின்றன. ‘புணரின் புணராது பொருளே, பொருள் வயிற்/பிரியின் புணராது புணர்வே'(நற்றினை: 16), அதாவது புணர்ச்சியில் திளைத்தால் பொருள் கிடைக்காது. பொருளுக்காக பிரிந்தால் புணர்ச்சி இன்பம் கிட்டாது என ஆண் நினைக்கிறான். ‘…நாளும் என் / நெஞ்சுபிணிக் கொண்ட அம்சில் ஓதிப்/ பெருந்தோள் குறுமகள் சிறுமெல் ஆகம்/ ஒருநாள் புணரப் புணரின்/ அரைநாள் வாழ்க்கையும் வேண்டலன் யானே’ (குறுந்தொகை: 280) அதாவது காதலியை ஒருநாள் புணர்ந்தால் அதற்கு ஈடாக தனது அரைநாள் வாழ்க்கை வேண்டாம் என்கிறான். புணர்ச்சி, ஆணின் வாழ்நாளைக் குறைக்கும் என்று இங்கே நேராக கூறப்படவில்லை என்றாலும், புணர்ச்சி போகத்தால் ஆணின் வாழ்நாள் குறையும் என்ற எண்ணம் அந்தக் காலத்தில், வழக்கத்தில் இருந்ததை இந்தப் பாடல் மறைமுகமாக வெளிப்படுத்துகிறது.

    ‘சிறு வெள் அரவின் அவ்வரிக் குருளை/ கானயானை அணங்கியா அங்கு/ இளையள் முளைவாள் எயிற்ற/ வளையுடைக் கையள் எம் அணங்கியோளே’ (குறுந்தொகை: 119)… அதாவது காட்டு யானையை சிறிய பாம்புக் குட்டி கடித்து துன்புறுத்துவது போல் தன்னை ஒரு இளம் பெண் துன்புறுத்தி விட்டதாக சொல்கிறான். அதேநேரம் மறைமுகமாக ஆணின் வலிமையை பாலியல் உறவு அழித்துவிடும் என்று இந்த பாடல் சொல்வதாகவும் வாசிக்கலாம்.

    இப்படியாக பாலியலை அற ஒழுக்கம் சார்ந்த விஷயமாக பார்க்காத மரபு சங்ககாலத்துக்கு முன்பு அதிகமும், சங்க காலத்தில் ஓரளவும் இருந்திருக்கின்றன. அப்படிப்பட்ட மரபு களப்பிரரை அழித்து தமிழகத்தை ஆள வந்த பல்லவ – பாண்டியர் காலத்தில் மெல்ல மெல்ல மாற்றமடைந்திருக்கிறது.

    அதாவது பாலியல் நடத்தையை ஒழுக்கவியல் பிரச்னையாக பார்க்காத சங்க கால இலக்கியத்துக்கு விதிகளை வகுக்க முற்பட்ட பிற்காலத்திய தொல்காப்பிய இலக்கண மரபு, பாலியல் ஒழுக்க விதிகளை வரையறுக்கும் வகையில் அதிகாரம் படைத்ததாக விஸ்வரூபம் எடுத்திருக்கிறது.

    பக்தி இலக்கியங்களில் பெரும்பாலானவை தோன்றிய காலகட்டம் இந்த பல்லவ – பாண்டியர் காலகட்டமே என்பதை உணரும்போது பாலியல் அரசியலின் ஆரம்பம் புரிய ஆரம்பிக்கிறது….

    பின்குறிப்பு:

    1. இந்தக் கட்டுரை எழுத ராஜ் கெளதமன் எழுதியுள்ள ‘பாட்டும் தொகையும் தொல்காப்பியமும் தமிழ்ச் சமூக உருவாக்கமும்’ என்ற நூல் (‘தமிழினி’ பதிப்பகம் வெளியீடு) பெரிதும் பயன்பட்டது.
    1069791_10203199636461314_600854483_n
    கே. என். சிவராமன்
    கட்டுரை ஆக்கம்
    திரு.கே. என். சிவராமன் அவர்களுக்கு நன்றி

     
  • Tags: ,

    கதையல்ல..நிஜம்

    நிகழ்வை கதையாக

    கதை 1 :

    அமெரிக்க நிலப்பரப்பிற்குச் சென்ற ஆங்கிலேயர்கள் பூர்வீக குடிகளான செவ்விந்தியர்களின் குடியிருப்புகள் மீது தாக்குதல்கள் நடத்தினர். துப்பாக்கி உள்ளிட்ட நவீன ஆயுதங்களுடன் தாக்கிய ஆங்கிலேயர்களை எதிர்த்து வெறும் வில் அம்பு, ஈட்டிகள் கொண்டு செவ்விந்தியர்கள் காட்டிய வீரம் ஆங்கிலேயர்களை அதிர வைத்தது! மண்ணையும், கலாச்சாரத்தை இழக்க விரும்பாத எண்ணம்தான் அந்த வீரம். ஆனால் நாளடைவில் ஒவ்வொரு பகுதியாக இழந்து வந்த செவ்விந்தியர்கள் ஒரு கட்டத்தில் முற்றிலும் அனைத்தையும் இழக்கத் துவங்கினர். இருப்பினும் ஆங்கிலேயர்களுக்கு அவர்கள் காட்டிய வீரத்தின் மீதான பிரம்மிப்பும், பயமும் போகவில்லை. மீண்டும் அவர்கள் ஒருங்கிணைந்து நம்மை திருப்பி விரட்டிவிட மாட்டார்கள் என்பது என்ன நிச்சயம்?

    அப்போதுதான் ஆங்கிலேயர்களுக்கு ஒரு அருமையான யோசனை தோன்றியது. செவ்விந்தியர்களின் இளம் வயது பிள்ளைகளை அவர்களிடம் இருந்து வலுக்கட்டாயமாகப் பிரித்து தனி பகுதி ஒன்றை ஏற்படுத்தி அவர்களை அங்கு தங்க வைத்து ஆங்கில மொழியும், ஆங்கிலேயர்கள் உணவு, உடை கலாச்சாரமும் பயிற்றுவித்தனர். இப்படியாக பல ஆண்டுகள் பிரித்து வைக்கப்பட்ட செவ்விந்திய இளம் தலைமுறை தங்கள் தாய்மொழியை முற்றிலும் மறந்து ஆங்கிலம் மட்டும் பேசி ஆங்கில உணவுகளை உண்டு ஆங்கிலேய உடை அணிந்து வாழத் துவங்கிவிட்டது. தங்கள் மொழியை இழந்ததன் மூலம் கலாச்சாரத்தை இழந்தது. வாழ்வியலை இழந்தது. மண்ணை இழந்தது. இதன் காரணமாக வீரத்தை முற்றிலும் இழந்தது. இன்றுவரை ஆங்கிலேயர்கள் அங்கு சவுக்கியமாக எந்த எதிர்ப்பும் இன்றி ஆட்சி புரிகின்றனர்.

  • கதை 2 :

    உலகின் பல நாடுகளில் பிரிந்து வாழ்ந்துகொண்டு இருந்த யூத இனம். பல நூற்றாண்டுகளாக அவர்கள் போய்ச் சேர்ந்த அந்தந்த நாடுகளில் வாழ்ந்து வந்தாலும் எந்த ஒரு நாடும் அவர்களை தன் மக்களாய் பார்க்கவில்லை. அன்னிய உணர்வுடனேயே இருந்தது. இந்த நூற்றாண்டின் துவக்கத்தில் ஐரோப்பாவின் ஒவ்வொரு நாட்டிலும் அவர்கள் தாக்கப்படத் துவங்கினர். இதன் உச்சகட்டமாய் ஹிட்லர் அவர்களைத் தேடித் தேடி கொத்துகொத்தாய் கொலை செய்யத்துவங்கினார். இந்த சந்தர்ப்பத்தில்தான் தங்களுக்கென ஒரு நாடு வேண்டும் என்ற சிந்தனை அவர்கள் மனதில் வரத்துவங்கியது.

    ஆனால் அது சாதாரண வேலை அல்ல. காரணம் ஒவ்வொரு நாட்டிலும் வசித்து வந்த யூதர்கள் தங்கள் மொழியை அறவே மறந்து அந்தந்த நாட்டு மொழிபேசி அந்தப் பகுதியின் பிரஜையாகவே தங்களை நினைத்து வந்தனர். அந்த சிந்தனையை மாற்றி எங்கிருந்தாலும் தாங்கள் யூதர்கள் என்று நினைப்பை அவர்களுக்கு வர வைக்க வேண்டும் என்றால் வழக்கொழிந்து சில ஆயிரம் பேர் மட்டும் அறிந்ததாக இருக்கும் தங்கள் தாய்மொழியான “ஹீப்ரூ” மொழிக்கு உயிர் குடுத்தால் மட்டுமே அந்த உணர்வை கொண்டு வர முடியும் என்ற உண்மை புரிந்தது. உலகின் ஒவ்வொரு நாட்டிலும் உள்ள யூதர்களின் இளைய தலைமுறையைச் சேர்ந்த சிலர் அருகில் உள்ள நாடுகளில் இருந்த யூதமொழி தெரிந்த தங்களது மூத்தவர்களிடம் அம்மொழியைக் கற்று தங்கள் பகுதிக்கு வந்து அங்கிருந்த யூதர்களுக்குத் தங்கள் தாய்மொழியைக் கற்பித்தனர். ஓரிரு ஆண்டுகளில் உலகின் அனைத்து யூதர்களும் ஹீப்ரூவை அறிந்ததும் தங்களுக்கான மொழியை மீட்டதுபோல தங்களுக்கான பூமியையும் உருவாக்க முடியும் என்ற தன்னம்பிக்கை பிறந்தது. அதன் தொடர்ச்சியாக இஸ்ரேல் என்ற ஒரு தேசத்தை தங்களுக்கென உருவாக்க முடிந்தது!

    நீதி : மொழியை, கலாச்சாரத்தைத் தொலைத்த செவ்விந்தியர்கள் மண்ணை இழந்தனர். மொழியை,கலாச்சாரத்தைப் பெற்ற யூதர்தள் மண்ணைப் பெற்றனர்!!
    .(புதுகை அப்துல்லா )M.m. Abdulla
    M.m. Abdulla

     
  • Leave a comment

    Posted by on June 26, 2014 in 1

     

    Tags: , , , , , , , , ,

    ஓவர்டோஸ் ஆபத்து, டாக்டர் மோடி…

    1623720_871600872867490_4948435172618749563_nநோயாளிக்கு எது நல்லது என்று டாக்டருக்கு தெரியும்.

    யார் நோயாளி என்பது டாக்டர் நரேந்திர மோடிக்கு தெரியும்.

    பிரதமர் பதவி ஏற்ற பிறகு கோவாவில் பிஜேபி ஊழியர்கள் கூட்டத்திலும், பின்னர் நாடாளுமன்ற மண்டபத்தில் எம்.பி.க்கள் மத்தியிலும் பேசும்போது அது நமக்கு தெரிந்தது.

    ‘நாடு இன்று மிகவும் மோசமான நிலையில் இருக்கிறது. பொருளாதாரம் சீர்குலைந்து கிடக்கிறது. இந்த நிலைமையை சீர் செய்ய வேண்டுமானால், சில கடுமையான நடவடிக்கைகளை எடுத்தாக வேண்டும். அவை கசப்பான மாத்திரைகளாக இருக்கும். ஆனால் நோயை விரட்டி ஆரோக்யத்தை மீட்க அந்த கசப்பு மாதிரைகளை விழுங்கியே தீர வேண்டும்’ என்று மோடி சொன்னார்.

  • உடம்பு சரியானால் சரி என்று ஆவலுடன் காத்திருந்த இந்தியா, கசப்பு மருந்தை விழுங்க ஆவென்று வாயை திறந்தது. டாக்டர் சட்டென்று பாகற்காய், வேப்பங்காய் என்று வரிசையாக கசப்பு மாத்திரைகளை வாயில் போட்டு மூக்கை பொத்தி தண்ணீர் ஊற்றப் போகிறார் என்பது, பாவம் நோயாளிக்கு அப்போது தெரியாது.

    முதலில் கவர்னர்கள் நீக்கம். அடுத்தது சமூக ஊடகத்தில் இந்தி திணிப்பு. மூன்றாவது ரயில் கட்டண உயர்வு.

    ‘மோடிஜி கோ லானே வாலே ஹைன், அச்சே தின் ஆனே வாலே ஹைன்’ என்ற பாடலை கட்சியின் தேசிய கீதமாக்கி ஆட்சிக்கு வந்தவர் மோடி. ’அப் கி பார் மோடி சர்க்கார்’ என்ற கோஷத்தையும் சேர்த்து பார்க்க வேண்டும். ’மோடி வந்து விட்டார், நாட்டுக்கு நல்ல காலம் பிறந்து விட்டது’ என்று கொண்டாடினார்கள் தொண்டர்கள்.

    விவரம் அறிந்த தமிழர்கள் அமைதி காத்தார்கள். நல்லகாலம் பிறக்குது என்று வீட்டு வாசலுக்கு வந்து குடுகுடுப்பை அடித்து குறி சொல்லும் கோடங்கிகள் அவர்களுக்கு புதிதல்ல. எல்லாம் இந்தி மயமாக இருக்கிறதே என்று யோசித்தார்கள்.

    வாஜ்பாய் மிகப்பெரிய இந்தி பேச்சாளராகவும் அபிமானியாகவும் இருந்தபோதிலும், அவர் காலத்தில் தேர்தலை சந்தித்தபோது ’இண்டியா ஷைனிங்’ என்ற கோஷத்தை பிஜேபி முன்வைத்தது. எதார்த்த நிலைக்கு முரணான அந்த கோஷமே 2004 தேர்தலில் அந்த கட்சியின் வீழ்ச்சிக்கு காரணம் என பிற்பாடு சொல்லப்பட்டது. விஷயம் அதுவல்ல. பெரும் தலைவராக இருந்த போதிலும் பிரசாரத்தில் வாஜ்பாய் என்ற தனிநபர் முன் நிறுத்தப்படவில்லை. இன்னொன்று, இந்தி பேசும் மக்களின்கட்சியாக கருதப்பட்ட பிஜேபி அகில இந்தியாவுக்கும் பொதுவான மொழி ஆங்கிலம் என்பதை அங்கீகரிக்கும் பாணியில் அந்த மொழியில் தேர்தல் பிரசார மந்திரத்தை உருவாக்கியது.

    இந்த தேர்தலில் அமெரிக்க தேர்தல் ஸ்டைலை சுவீகரித்தது பிஜேபி. கட்சியை காட்டிலும் தனி மனிதரை முன் நிறுத்தி, அவரை மையப் புள்ளியாக்கி பிரசாரம் செய்யும் உத்தி அந்த நாட்டுக்கு சொந்தமானது. ஆனால், பிரசார கோஷங்கள், வாசகங்களை தயாரிப்பதில் முழுக்க முழுக்க இந்திக்கு முதல் மரியாதை வழங்கப்பட்டது. மோடி வழி தனி வழி என்பது இந்த வியூகத்தின் மூலம் நாட்டுக்கு பிரகடனம் செய்யப்பட்டது. ஐக்கிய முற்போக்கு கூட்டணி அரசின் கையாலாகா தனத்தால் ஆத்திரம் அடைந்திருந்த மக்களுக்கு அது கவர்ச்சியாகவே தெரிந்தது. வித்தியாசமான ஆட்சி தருவார் என்று அமோகமாக ஆதரவு அளித்தனர்.

    இவ்வளவு சீக்கிரம் ஏமாற்றம் தாக்கும் என்பதை அவர்கள் எதிர்பார்க்கவில்லை.

    கவர்னர்கள் மாற்றத்தை பார்ப்போம். அந்த பதவியே தேவையில்லை என்ற கருத்து பல காலமாக சொல்லப்படுகிறது. ஆட்டுக்கு தாடி எத்தனை அவசியமோ அது போன்றதுதான் கவர்னர் பதவி என்ற சிந்தனை தமிழ் மண்ணில் இருந்து பரவியதுதான். ஓரம் கட்டப்பட்ட அரசியல்வாதிகள், ஓய்வு பெற்ற அதிகாரிகள் ஆகியோரை குடியமர்த்தும் மறுவாழ்வு இல்லம்தான் ராஜ்பவன். மத்தியில் ஆட்சி அமைக்கும் கட்சியின் விருப்பத்துக்கு இணங்க செயல்படுவதுதான் கவர்னரின் கடமை என்பது எழுதப்படாத விதி. ஆகவே மத்தியில் ஆட்சி மாறும்போது கவர்னர்கள் மாற வேண்டும் என்பது ஆட்சேபிக்க முடியாத நியதி.

    விஸ்தாரமான மாளிகையில் ஆள் அம்பு சேனையுடன் மாநில ஆட்சியின் தலைவராக வசிக்கும் சுகபோக வாழ்க்கையை சுலபத்தில் கைவிட யாருக்கும் மனம் வராது. என்றாலும், அப்படி தயங்குபவர்களை எப்படி வெளியேற்றுவது என்பதில் ஒரு இங்கிதம் வேண்டும். உள்துறை செயலாளரை விட்டு போன் போட்டு, ‘உங்கள் ராஜினாமா கடிதத்தை நாளைக்குள் ஃபேக்ஸ் பண்ணுங்கள்’ என்று கட்டளை பிறப்பிக்க செய்வது கடைந்தெடுத்த அநாகரிகம். அமைச்சரே அழைத்து வேண்டுகோளாக சொல்லியிருக்கலாம். பதவிக்கான பணியும் பதவி வகிப்பவரின் லட்சணமும் எப்படி இருந்தாலும், கவர்னர் என்பது அரசியல் சாசனத்தின்படி கவுரவம் மிகுந்த பதவி. அந்த பதவியையே ஒழிக்க அரசியல் சாசன திருத்தம்கொண்டு வந்து நிறைவேற்றும் வரையில், அதற்கான மரியாதையை காப்பாற்ற வேண்டியது அரசின் பொறுப்பு. ராஜ்நாத் சிங் அதை உணரவில்லையா, அல்லது மோடியின் வழிகாட்டுதலில் நடந்த நாடகமா என்பது தெரியவில்லை.

    இந்தி மொழியை கட்டாயமாக பயன்படுத்த வேண்டும் என்று உயர் அதிகாரிகளுக்கு பிறப்பித்த உத்தரவு அடுத்த சொதப்பல்.
    தகவல் பரவுவதில் சமூக ஊடகங்களின் பங்களிப்பு பெருகி வரும் காலம் இது. அரசியல்வாதிகளும் அதிகாரிகளும் அவற்றை பயன்படுத்துவதில் ஆர்வம் காட்டுகின்றனர். அவர்கள் எந்த மொழியிலும் தகவல் பதிவு செய்ய இந்த ஊடகங்களில் வசதி இருக்கிறது. பிரதமர் மோடி தனக்கென தனி தளம் வைத்திருக்கிறார். ட்விட்டரிலும் ஃபேஸ்புக்கிலும் அக்கவுண்ட் வைத்து தன் கருத்துக்களை ஆங்கிலம், இந்தி மொழிகளில் பதிவிடுகிறார். காங்கிரஸ் கட்சியும் அதன் தலைவர்களும் அவ்வாறு செய்கின்றனர். இந்த நிலையில் திடீரென அதிகாரிகள் இந்திக்கு முன்னுரிமை கொடுத்து பதிவுகள் இடுமாறு சுற்றறிக்கை அனுப்பி இருப்பது மென்மையாக சொன்னால் வேண்டாத வேலை.

    டெலிபோனில் ஒருவர் பேசுவது எந்த மொழியாக இருந்தாலும் அதை நீங்கள் விரும்பும் மொழியில் கேட்கவும், நீங்கள் உங்கள் மொழியில் அளிக்கும் பதிலை அவர் தனது மொழியில் கேட்டுக் கொள்வதற்கும் வசதி வந்துவிட்டது. சோதனை முறையில் வெற்றி அடைந்துள்ள இந்த தொழில்நுட்பம் விரைவில் பொது வழக்கில் வர இருக்கிறது. தகவல் தொடர்பில் இவ்வளவு புரட்சிகரமான முன்னேற்றம் ஏற்பட்டு, மொழிகளுக்கு இடையிலான தடுப்புகள் அடியோடு தகர்க்கப்படும் சூழலில் மத்திய அரசு இம்மாதிரி ஓர் உத்தரவை பிறப்பிக்க நினைத்ததே பிற்போக்கானது. கேலிக்குரியது. ஆபத்தானது.

    மத்திய அரசின் விளம்பரங்கள், அறிவிப்புகள், டெண்டர்கள் இந்தியா முழுவதும் பத்திரிகைகளில் பிரசுரம் ஆகின்றன. ஒவ்வொரு மாநிலத்திலும் அதன் மொழியில் இவை வெளியாகின்றன. பாதியை சம்பந்தப்பட்ட துறையே தயாரிக்கின்றன. மீதி அந்தந்த பத்திரிகைகளால் மொழி மாற்றம் பெறுகின்றன. முழுவதுமே அரசு தரப்பில் தயாரித்து வழங்க கட்டமைப்பு வசதி இருக்கிறது. அதை இன்னும் பலப்படுத்த வழி இருக்கிறது. எனவே, இன்டர்நெட்டிலாவது மத்திய அரசின் ஒவ்வொரு அறிவிப்பையும் ஆணையையும் யார் எந்த மொழியில் விரும்புகிறாரோ அதில் பார்த்து படிக்க வழி செய்து கொடுப்பதுதான் முறை. அங்கீகரிக்கப்பட்ட ஆட்சிமொழிகள் 22 இருந்த போதிலும், அது ஒன்றும் கடினமான காரியம் அல்ல. அரசின் தகவல் பரிமாற்ற தொழில்நுட்பத்தில் அடுத்த கட்டம் அதுவாகத்தான் இருக்க வேண்டும்.

    மோடி சர்க்கார் சறுக்கிய அடுத்த விவகாரம் ரயில் கட்டண உயர்வு. 2012 மார்ச்சில் சரக்கு கட்டணத்தை ஐ.மு.கூ அரசு உயர்த்தியபோது மோடி கடுமையாக விமர்சனம் செய்தார். ‘ரயில்வே பட்ஜெட் தாக்கல் செய்வதற்கு இன்னும் சில வாரங்களே உள்ள நிலையில், இவ்வாறு அவசரமாக அறிவிக்க என்ன அவசியம்? இது நாடாளுமன்றத்தை பைபாஸ் பண்ணுவதாக ஆகாதா?’ என்று மன்மோகன் சிங்குக்கு கடிதம் எழுதினார். அடுத்தவரிடம் சுட்டிக் காட்டிய தவறை அவரே செய்திருக்கிறார். உயர்வு தவிர்க்க முடியாத்தாக இருந்தால், ரயில்வே பட்ஜெட்டில் அதை விளக்கி, நாடாளுமன்றத்தில் விவாதித்து, அமைச்சர் பதில் அளித்து நிறைவேற்றி இருக்கலாம்.

    செய்வதையும் செய்து விட்டு அதற்கு இன்னொருவர் மேல் பழி போடுவது கேவலமான செயல். ‘இந்தி கட்டாயம் என்ற அறிக்கை முந்தைய அரசால் தயாரிக்கப்பட்டது. மோடி அரசுக்கு சம்பந்தமில்லை’ என சில அமைச்சர்கள் சப்பைக்கட்டு கட்டுகின்றனர். அப்படியானால் மோடி பதவி ஏற்ற பிறகு அந்த ஆணைகளை ஏன் வெளியிட வேண்டும்? ரத்து செய்திருக்கலாம் அல்லது அப்படியே கிடப்பில் போட்டிருக்கலாமே.

    இதே சப்பைக் கட்டுதான் ரயில் கட்டண உயர்வுக்கும். ’முந்தைய அரசு கட்டண உயர்வை அறிவித்து விட்டு, தேர்தலில் தோல்வி அடைந்ததும் அறிவிப்பை நிறுத்தி வைத்தது. அதைத்தான் இப்போது வெளியிட்டோம்’ என்கிறார்கள். மக்கள் ஏற்க மாட்டார்கள் என்பது புரிந்து முந்தைய அரசு நிறுத்தி வைத்த கட்டண உயர்வை, இந்த அரசு அப்படியே அமல்படுத்த துணிகிறது என்றால் என்ன அர்த்தம்?

    மாற்றம் வேண்டும் என்றுதான் மோடி கையில் அதிகாரத்தை கொடுத்துள்ளனர் மக்கள். பழைய ஆட்சியின் செயல்பாட்டு முறைகளையே அவரும் பின்பற்றினால் இரண்டும் ஒரே குட்டையில் ஊறிய மட்டைகள் என்ற முடிவுக்கு வந்து விடுவார்கள்.

    அமைச்சரவை குழுக்கள் அமைத்து பிரச்னைகளை விவாதிப்பதால் முடிவு எடுக்க தாமதம் ஏற்படுகிறது என்று கூறி, முந்தைய அரசு அமைத்த குழுக்களை ஒட்டு மொத்தமாக கலைத்தார் மோடி. ஒரே வாரத்தில் புதிதாக குழுக்களை உருவாக்கி இருக்கிறார். காரணம் தெரிவிக்கவில்லை. சொல்லுக்கும் செயலுக்கும் வித்தியாசம் பெரிதாகிக் கொண்டே போவது மோடி சர்க்காரின் இமேஜுக்கு நல்லது அல்ல.

    கசப்பு மருந்து வீரியம் உள்ளதாக இருந்தாலும், அடுத்தடுத்து கொடுத்தால் ஓவர்டோஸ் ஆகி நோயாளியின் உயிருக்கு ஆபத்தாக முடிந்துவிடும் என்பதை டாக்டர் மறந்துவிட கூடாது.

    (இழு தள்ளு 39/ கதிர்/ குமுதம் ரிப்போர்ட்டர் 29.06.2014)
    kathirkathirvaelKathir Vel
    நன்றி கட்டுரை தந்த திரு.கதிர்வேல் அய்யா அவர்களுக்கு

     
  • Tags: , , , , , , , , , , , ,

    வாக்குமூலம்

    10462657_10203869875647897_2902473065877639421_n
    ‘நான்’ என்பது உலகமாயிருந்தது!
    பால் எது? சுண்ணாம்பு எது?
    விளங்காத போது
    ‘நான்’ என்பது உலகமாயிருந்தது.

    சூழ்ந்து கடிக்க வந்தன
    சுயநலங்கள்.
    ஒதுங்கி ஒடுங்கியதில்
    ‘நான்’ என்பது தானாய் ச்சிறுத்தது.

  • இப்போதும்
    இருட்டும் போதெல்லாம்
    வழிகளின் பயத்திலோ
    வலிகளின் உணர்விலோ
    உறவை, நட்பை உள் வாங்கி
    ‘நான்’ சற்றே விரிவதுண்டு.

    சமூக வீதிகளில்
    யுத்த காலங்களின்
    பரஸ்பர தாக்குதல்களில்
    இனத்தை மதத்தை
    இழுத்தணைத்து க் கொள்ளும் ‘நான்’.

    அதீத எதிர்பார்ப்புகளின் போதும்
    அநாதரவான தருணங்களிலும்
    இறை ஆதரவை நாடி ஓடி
    இணைந்துக்கொள்ளும் ‘நான்’.

    ஆதாயங்களின் போதும்
    கவனிப்பாரற்று தனிமை காணும் போதும்
    தன் கூடடங்கும் ‘நான்’.

    அளவீடுகளுக்கு அடங்காமல்
    மாறிக் கொண்டேயிருக்கும் ‘நான்’
    மண்ணில் அடங்கிப் பின் தீரும்.
    இப்னு ibnu
    Fakhrudeen Ibnu Hamdun

     
  • பைந்தமிழில் படிப்பது முறை !

    பாவலரேறு பெருஞ்சித்திரனார்
    இலக்குவனார் திருவள்ளுவன்
    thamizh10
    பழந்தமிழ் நாட்டில்
    பைந்தமிழ் மொழியில்
    படிப்பதுதானே முறை?
    இழந்தநம் உரிமை
    எய்திடத் தடுக்கும்
    இழிஞரின் செவிபட, அறை!

    கனித்தமிழ் நிலத்தில்
    கண்ணெனுந் தமிழில்
    கற்பது தானே சரி!
    தனித்தமிழ் மொழியைத்
    தாழ்த்திய பகையைத்
    தணலிட் டே, உடன் எரி!

  • தமிழ்வழங் கிடத்தில்
    தாய்மொழி வழியாய்த்
    தமிழர் படிப்பதா பிழை?
    அமிழ்ந்தவர் எழுந்தால்
    அயலவர்க் கென்ன?
    அயர்வதா? நீ, முனைந் துழை!

    பிறந்தநம் மண்ணில்
    பீடுறும் தமிழில்
    பேசுதற் கோ, ஒரு தடை?
    மறந்த,பண் பாட்டை
    மறவர்கள் மீட்க
    மறிப்பவர் எவர்? கொடி றுடை!

    முத்தமிழ்த் தரையில்
    முதுதமிழ் மொழியில்
    முறைப்படப் பயில்வதா தீது?
    எத்துறை அறிவையும்
    ஏற்குநந் தமிழே!
    இனியுங்கள் பருப்பு, வே காது!

    அத்தனை, பாட்டனை
    அடிமைசெய் ததுபோல்
    ஆரையிங் கரற்றுவாய் இன்னும்?
    எத்தனை ஆண்டுகள்
    இழப்பதெம் உரிமை?
    எழுந்திடின் கழுகுமைத் தின்னும்!
    perunchiththiranar01

    http://mudukulathur.com/?p=26773

     

    பல ஒற்றுமைகளில் சில வேற்றுமைகள்- வவ்வால் (Bat)

    bat-660x330உலகத்தில் இறைவனால் படைக்கப்பட்டுள்ள பாலூட்டிகளில் பெரும்பாலான இனங்கள் அழிந்துவிட்டதாக விஞ்ஞானிகள் கூறுகின்றார்கள். இன்றளவிலும் லட்சக்கணக்கான ஆண்டுகளுக்கு முந்தைய மிகப் பழமையான புதைப்பொருள் எலும்புக்கூடுகளை கண்டுபிடிக்கின்றனர். கிட்டதட்ட ஒரு லட்சம் பாலூட்டிகள் இந்த உலகில் இருந்ததாகவும் அவற்றில் பெரும் பகுதி அழிந்துவிட்டதாகவும் தற்போது 4000 பாலூட்டிகள் மாத்திரமே உள்ளதாகவும் கூறுகின்றார்கள். மேலும் இவற்றின் எண்ணிக்கை மிக வேகமாக குறைந்து வருவதாகவும் இன்னும் ஒன்றிரண்டு தலைமுறைக்கு பிறகு பல உயிரினங்களை உயிரியல் கண்காட்சிகளில் மாத்திரமே காணக்கூடிய நிலை ஏற்படும் என்றும் திட்ட வட்டமாக கூறுகின்றார்கள். ஏனென்றுச் சொன்னால் பல விலங்குகளின் நிலை விரல் விட்டு எண்ணக்கூடிய நிலையில் இருப்பதே இதற்குச் சான்றாகும். இந்த எண்ணிக்கையில் உள்ள பாலூட்டிகளில் ஏறக்குறைய நான்கில் ஒருபகுதி இனங்களைக் கொண்டது வவ்வால் இனமாகும். நாம் இந்தத் தலைப்பில் அல்லாஹ்வுடைய படைப்புக்களில் மற்றவற்றிலிருந்து வவ்வால் எந்த பண்புகளில் எந்த தகவமைப்பில் வேறுபட்டுள்ளது என்பதை விரிவான முறையிலே பார்ப்போம்.

  • bat

    Bat

    “பறக்கக்கூடிய” தன்மையைப் பெற்ற ஒரே பாலூட்டி வவ்வால் ஒன்றுதான்

    குட்டிப்போட்டு பறக்கக்கூடியத் தன்மையைக்கொண்ட இந்தப்பாலூட்டி பல அதிசியத்தக்க தன்மைகளை தன்னகத்தே கொண்டுள்ளது. கீழ் காணும் படம் வவ்வால் தன் சிறகை(கையை) விரித்து பறக்கக்கூடிய காட்சி.
    bat.ht2
    Bat

    உலகில் உள்ள பாலூட்டிகளில் மிகச்சிரியது பம்பல்பீ வவ்வால் ஆகும். தங்கள் உடல் எடையைக் காட்டிலும் மூன்று மடங்கு அதிகமாக் உண்ணக்கூடிய அதிசயத்திலும் அதிசயம்.

    வவ்வால்கள் இரண்டு பெரும் பிரிவுகளாக பிரிக்கப்பட்டுள்ளன. இவைகளின் உருவ அமைப்பை வைத்து பெரிய வவ்வால்கள் (Mega bats) எனவும் சிரிய வவ்வால்கள் (Mictro bats) எனவும் பிரிக்கப்பட்டுள்ளன. பெரிய வவ்வால்களில் குறிப்பிடத்தக்கது பிளையிங் ஃபாக்ஸ் (Flying fox) வவ்வால் ஆகும். இவை அதிகபட்சமாக 41 செ.மீ வரை வளரக்கூடியது. சிறிய வகை வவ்வால்களில் குறிப்பிடக்தக்கது பம்பல்பீ(Bumble Bee) வவ்வால் ஆகும். இவை மூன்று செ.மீ நீளமும் இரண்டு கிராம் எடையும் உள்ளதாகும். இதுதான் உலகில் உள்ள பாலூட்டிகளில் மிக சிறியதாகும். மேலும் இவைகளின் உணவு முறைகளை வைத்தும் இரண்டு பிரிவுகளாகவும் பிரிக்கப்பட்டுள்ளன. ஒன்று பழங்கள், பூக்கள் மற்றும் பூக்களின் குளுகோஸ், மகரந்தத் தூள் ஆகியவற்றை உண்டு வாழக்கூடியவை. மற்றது சிறிய பூச்சிகள் வண்டுகள் சிறிய வகை பாலூட்டிகள் சிறிய பறவைகள் ஈக்கள் கொசுக்கள் தவளை மற்றும் மீன்கள் ஆகியவற்றை உண்டு வாழுகின்றன. வவ்வால்களில் மொத்தம் 951 இனங்கள் இருப்பதாக கணக்கிட்டுள்ளார்கள். அவற்றில் மூன்றே மூன்று வகைகள் உயிர் பிராணிகளின் இரத்தத்தை மட்டுமே குடித்து உயிர் வாழக்கூடியது. உதாரணமாக வம்பயர் வவ்வால்கள் (Vampire) இவைகளின் கூறிய பற்களைக்கொண்டு முதலில் பிராணிகளின் உடலில் காயத்தை ஏற்படுத்துகின்றன. அதிலிருந்து ஒரு முறைக்கு 20 மில்லி வரை இரத்தத்தை குடிக்கின்றன. இந்த அளவு அவற்றின் எடையில் 40 சதவிகிதம் ஆகும். மேலும் ஒரு ஆச்சர்யமான விஷயம் என்னவென்றால் வோல்ட் வார்ல்ட் புரூட் வவ்வால்கள் (Old world fruit bats) ஒரு நேரத்திற்கு 500 கிராம் வரை பழங்களை உண்ணுகின்றன. இந்த அளவு இவற்றின் எடையைக் காட்டிலும் மூன்று மடங்கு அதிகமாகும். இதுவே அல்லாஹ்வின் ஆற்றலை வெளிப்படுத்தும் ஒரு நிகழ்ச்சிதான். நம்முடைய பகுத்தறிவுக்கு ஏற்றுக்கொள்ள இயலாத ஒரு விசயமாக இருப்பினும் கூட அல்லாஹ்வுடைய ஆற்றலை எண்ணி வியப்படையக்கூடிய சம்பவமாகவே இது அமைந்துள்ளது.

    தங்குமிடங்கள்

    வவ்வால்கள் பொதுவாக ஒரு சமுதாயமாக கூடி வாழுகின்றன. ஒரு கூட்டத்தில் 2000க்கம் மேற்ப்பட்ட வவ்வால்கள் வாழுகின்றன. இவைகள் வருடம் முழுதும் தங்களுக்கு உணவுத்தட்டுபாடின்றி கிடைக்கக்கூடிய இடங்களை தேர்வு செய்து வாழுகின்றன. உலகின் அனைத்து பிரதேசங்களில் காணப்பட்டாலும் கூட மிக அதிக அளவில் வெப்பம் மிகுந்த நாடுகளில் பொதுவாகக் காணப்படுகின்றன. இவைகள் குகைகள் பாறை இடுக்குகள் பொந்துகள் பள்ளங்கள் ஆகியவற்றில் இருப்பிடத்தை அமைத்துக்கொள்ளுகின்றன. இன்னும் சில வவ்வால்கள் நாம் காணக்கூடிய வகையிலே மரங்களின் கிளைகளிலே தலைகீழாக தொங்கிக்கொண்டிருக்கின்றன. இவைகள் தலைக்கீழாக தொங்கக்கூடிய இந்க செயலும் கூட மற்ற எல்லாவற்றிலும் வேறுப்பட்டுள்ள ஒரு நிலைதான். மேலும் தலைக்கீழாக தொங்குவதற்கு எந்தவிதமான சக்தி இழப்பும் இவைகளுக்கு ஏற்படுவதில்லை. இதுவும் ஒரு ஆச்சர்யமான நிகழ்வாகும். மனிதர்களைப்பொருத்த வரை இரண்டு நிமிடங்கள் கைகளை ஒரே நிலையில் தூக்கி வைக்க இயலாது என்பதை நாம் அனைவரும் அறிந்த ஒன்றுதான். இவைகள் தலைகீழாக தொங்கும் போது இவற்றின் உடல் எடையின் காரணமாக பின்புற கால்களின் தசை நார்கள் ஒன்றுடன் ஒன்று தன்னிச்சையாக கோர்த்து இணைந்துக்கொள்வதன் மூலம் இவற்றின் விரல் நகங்கள் தொங்கும் மேற்புறத்தை இறுகப் பற்றிப்பிடித்துக்கொள்ளுகின்றன. இதனால் எந்த விதமான சிரமமுமின்றி இவை உறக்கத்தில் ஈடுபடுகின்றன.

    pictur5உலகில் உள்ள உயிரினங்களில் ஆண் இனத்தின் மார்பில் பால் சுரக்கும் சம்பவம் தயாக் (Dayak) வவ்வால்களில் மட்டுமே காணக்கூடிய அதிசயம்

    நாம் பொதுவாக அறிந்திருப்பது என்னவென்றால் முட்டையிடுதல் கர்பமடைதல் பாலூட்டுதல் போன்ற பண்புகளை பெண் உயிரினங்கள்தான் பெற்றிருக்கின்றன. 1994 ஆம் ஆண்டு விஞ்ஞானிகள் ஓர் உண்மையினை கண்டறிந்தார்கள். மலேசியாவில் வசிக்கக்கூடிய தயாக் (Dayak) பழந்தின்னி வவ்வால்களில் 10 ஆண் வவ்வால்களை ஆராய்ச்சி செய்து ஓரு அதிசியத்தக்க முடிவினை வெளியிட்டார்கள். நம் கற்பனையிலும் உதிக்காத ஒன்று ஆண் வவ்வால்களின் மார்பகங்களில் பால் சுரந்திருப்பது கண்டுபிடிக்கப்பட்டது. பாலூட்டிகளில் ஆண் உயிரினத்தின் மார்பில் பால் சுரக்கக்கூடியது இது ஒன்றாகத்தான் இருக்கும். இந்த தகவமைப்பு அல்லாஹ்வுடைய அரும்பெரும் ஆற்றலை காட்டக்கூடியதாகவும் நான் அனைத்திற்கும் ஆற்றலுடையவன் என்பதை இந்த உலகத்திற்கு உணர்த்தக் கூடிய நிகழ்ச்சியாகவே நமக்கு தோன்றுகின்றது.

    தூரப்பிரதேசத்தின் தட்பவெப்ப நிலைகளை துல்லியமாக அறிந்து 1600 மைல்களைக் கடந்து செல்லும் அதிசய ஆற்றல்

    வவ்வால்கள் சராசரியாக மணிக்கு 100 கிலோ மீட்டர் வேகத்தில் பறக்கும் ஆற்றலுடையவை. சில வகை வவ்வால்கள் வருடம் முழுதும் ஒரே மரத்தில் தங்கிவிடுகின்றன. ஆனால் சிலவகை வவ்வால்கள் உதாரணமாக மெக்ஸிகன் பிரிடெய்ல் வவ்வால்கள் குளிர் காலங்களில் தங்கள் இருப்பிடத்தை மாற்றி வெப்பப் பிரதேசங்களுக்கு பெரும் தூரத்திற்க்கு புலம்பெயர்ந்து செல்லுகின்றன. அமெரிக்காவிலிருந்து 1600 மைல்களைக் கடந்து மெக்ஸிகோவை வந்தடைகின்றன. இவைகள் எப்படி இவ்வளவு தூரப்பிரதேசத்தின் கால தட்ப வெப்பநிலையை துல்லியமாக அறிகின்றன என்பதை விஞ்ஞானிகளால் திட்டவட்டமாகக் கூறமுடியவில்லை. இவைகளின் மூளைப்பகுதியில் பூமியின் காந்த மண்டலங்களை அறியக்கூடிய அமைப்பு எதுவும் இருக்கலாம் என்று விஞ்ஞானிகள் அபிப்பிராயப்படுகின்றார்கள். நம்மைப் பொருத்த வரை தேனீக்களுக்கு வஹீ அறிவிக்கக்கூடிய இறைவன் இந்த வவ்வால்களுக்கும் வஹீ அறிவித்துத்தருகின்றான் என்பதில் மிக எளிதாக விடை கிடைத்தவிடுகின்றது.

    அடர்ந்த இருளிலும் பார்க்கக்கூடிய கண் அமைப்பு

    வவ்வால்கள் பகல் பொழுதை ஒய்விற்கும் இரவு பொழுதை தங்கள் வாழ்க்கைத் தேவைக்கும் பயன்படுத்துகின்றன. இவைகள் அந்திப்பொழுது முதல் வைகறைப்பொழுது வரை மிகச்சுறுசுறுப்பாக இயங்கக்கூடியவை. இரவில் இயங்கக்கூடிய சில உயிரினங்களில் வவ்வாலும் ஒன்றாகும். இரவில் நன்குப்பார்க்கக்கூடிய கண் அமைப்பைப் பெற்றிருக்கின்றன.அடர்ந்த இருளிலும் குறைந்க வெளிச்சத்திலும் நன்கு பார்க்கக்கூடிய கண் அமைப்பினை பெற்றுள்ளன. தூரக்கடல் தீவுகளில் வசிக்கக்கூடிய சில வவ்வால்கள் மாத்திரமே பகல் பொழுதில் தங்கள் இறையைதேடுகின்றன. இவைகளோடு மனிதர்களுக்கு உள்ளத்தொடர்பு இவற்றின் திடீர் குறுக்கீடு காரணமாக மனிதர்கள் சிலசமயம் பயத்திற்கு ஆட்படும் சம்பவம் நடைப்பெறுகின்றன. சராசரியாக வருடத்திற்கு ஒரு மனிதர் வவ்வாலினால் கடிக்கப்பட்டு இறப்பதாக புள்ளிவிபரங்கள் கூறுகின்றன. இவை நாய் மற்றும் வண்டு கடித்து இறப்பவர்களின் எண்ணிக்கையைக் காட்டிலும் மிகக்குறைவு.
    வம்பயர் வவ்வால் ஒரு விலங்குனுடைய இரத்தத்தை குடிக்கும் காட்சி
    pictur4
    “மஸ்டிப் வவ்வால்களின் ஒரு காலனி ஒரு இரவில் 250 டன் எடையுள்ள இரையை உண்டு முடிக்கக்கூடிய அபரிதமான ஆற்றல்”

    “எங்கள் இறைவா! இவற்றையெல்லாம் நீ வீணாக படைக்கவில்லை”. (அல்குர்ஆன் 3:191)

    சமீபக் காலங்களில் மனிதர்கள் வவ்வால்களின் பயன்பாடுகளை வெகுவாக அறிந்து வருகின்றார்கள். பொதுவாக வவ்வால்கள் கதைகளிலும் மற்றும் தொலைக்காட்சிகளிலும் தீய சக்திக்கும் சாத்தானிய சக்திகளுக்கும் உதாரணமாகக் கூறப்படுகின்றது. ஆனால் இன்றைய விஞ்ஞானிகள் இவைகளின் அளவற்ற பயன்பாடுகளைப்பற்றி சிலாகித்து கூறுகின்றனர். இவை முக்கியமாக மனிதர்களுக்கு ஊறுவிளைவிக்கக்கூடிய பூச்சி, கொசு, வண்டு மற்றும் ஈக்களை தங்கள் முக்கிய உணவாக உட்கொள்கின்றன. மெக்ஸிகோவில் வாழக்கூடிய மஸ்டிப்(mastiff) வவ்வால்கள் காலனியாக(கூட்டமாக) வாழக்கூடியது. இந்த வவ்வால்களின் ஒரு காலனி(கூட்டம்) ஒரு இரவில் 250 டன் (இரண்டு லச்சத்தி ஐம்பது ஆயிரம் கிலோ) எடையுடைய பூச்சி, வண்டு மற்றும் கொசுக்களை தங்கள் உணவாக உண்ணுகின்றன என்றுச்சொன்னால் சுபஹானல்லாஹ், இறைவன் இவற்றைக்கொண்டு மனிதர்களுக்கு ஏற்படுத்தியுள்ள(Pest control) பாதுகாப்பு அரணை வார்த்தைகளால் விளக்க முடியாது. சிறிய பழுப்பு நிற வவ்வால்கள் (Little brown bat) ஒரு மணி நேரத்தில் 600 கொசுக்கள் வரைப் பிடித்து உண்ணக்கூடியவை. இதிலிருந்து இவை மனித குலத்திற்கு ஆற்றக்கூடிய அளவற்றத் தொண்டினை வார்த்தைகளினால் எங்ஙனம் விளக்க இயலும். பல நாடுகளில் இன்று மக்களுக்கு நோய்களையும் இன்னபிற தொல்லைகளையும் கொடுக்கும் கொசுக்களை அழிக்க பட்ஜட் போட்டுக்கொண்டிருப்பதை பார்க்கின்றோம். இது கருணை மிக்க நம் இறைவன் அமைத்துள்ள வாழ்க்கைச் சுழற்ச்சி என்பது ஒன்றை ஒன்று சார்ந்து வாழக்கூடிய அமைப்பாகும். மேலும் இவைகள் தங்கள் உணவாக பழங்களான வாழை, மாம்பழம், கொய்யா பேரிச்சை, அத்தி ஆகியவற்றை உண்பதனால் வவ்வால்களின் மூலம் அயல் மகரந்தச்சேர்க்கை நடைப்பெற பெரிதும் துணைச்செய்கின்றன. இவைகளின் மூலம் 500 க்கும் மேற்ப்பட்ட தாவரங்களின் மகரந்தச் சேர்க்கை நடைப்பெற்று வருவதாக அரிய வந்துள்ளது. மேலும் இவற்றின் கழிவுகளில் மிக அதிக அளவிற்கு நைட்ரஜன் மற்றும் பாஸ்பரஸ் உள்ளதால் மிகச்சிறந்க உரமாக பூமிக்கு அமைந்துவிடுகின்றன. பல நாடுகளில் இவை வசிக்கக்கூடிய இடங்களிலிருந்து இவற்றின் கழிவுகள் சேகரிக்கப்பட்டு விவசாயத்திற்கு தேவையான மிக உயர் தரமான உரம் தயாரிக்கப்படுகின்றது. இவையும் இவற்றின பயன்பாடுகளின் மிகமுக்கியமானதாகும்.

    மனிதர்களுக்கு நேரடியான பயன்களும் இவற்றில் உள்ளன

    வம்பைர்(vampire) வவ்வால்களின் வாயில் சுரக்கும் உமிழ் நீரிலிருந்து மனிதர்களுக்கு ஏற்படும் இதய சம்பந்தமான நோய்க்கு மருந்து தயாரிக்கப்படுகின்றது. மேலும் மூளைக்கு செல்லும் இரத்தம் தடைப்படுவதை தடுக்கவும் காயங்களிலிருந்து வெளியேரும் இரத்தத்தை விரைவில் உறைய வைக்கவும் இவை பயனாகின்றன. பிரிடெய்ல் வவ்வால்களின் இருப்பிடங்களில் சேர்ந்த இற்றின் கழிவுகளிலிருந்து கிடைக்கக்கூடிய சோடியம் நைட்ரேட்டைக் கொண்டு அமெரிக்காவில் நடந்த சிவில் போரில்(1861-1865) வெடிமருந்து தயார் செய்துள்ள வரலாறும் நமக்கு காணக்கிடைக்கின்றது.

    அல்லாஹ்வின் படைப்பாற்றலை பறைச்சாற்றும் அதிய உடல் அமைப்பு
    bat.ht4
    உறை நிலையை கடந்து -5 (Minus 5) டிகிரி வரை தாங்கக்கூடிய ஆற்றல் பெற்ற சிவப்பு வவ்வால்கள்

    வவ்வால்கள் வெப்ப இரத்த பிராணியாக இருப்பினும் கூட இவை மற்றவற்றிலிருந்து வேறுபட்ட அம்சத்தை கொண்டுள்ளது. இவை இயங்கக்கூடிய நேரத்தில் மாத்திரமே உடல் வெப்பநிலையை ஒரே சீராக வைத்துள்ளன. இவை தலைக்கீழாக ஓய்வெடுக்கும் போது சுற்றுப்புற சூழலின் வெப்ப நிலைக்கு ஏற்ப இவற்றின் உடல் வெப்ப நிலை மாறிவிடுகின்றது. மனிதர்களைப் பொருத்த வரை 37 டிகிரிக்கு அதிகமாக உடல் வெப்பமானால் வியர்க்க ஆரம்பித்து விடுகின்றது. இதற்கு குறைந்து விட்டாலோ குளிர ஆரம்பித்து விடுகின்றது. மனிதனின் ஆற்றலில் குறிப்பிடத்தக்க அளவு கலோரி உடல் வெப்பநிலையை ஒரே சீராக வைத்துக்கொள்ள செலவாகின்றது. சிவப்பு நிற வவ்வால்களின் உடல் வெப்பநிலை உறைநிலையை கடந்து -5 டிகிரிவரை தாங்கிக்கொள்ளுகின்றன என்றுச்சொன்னால் அல்லாஹ் மகா தூய்மையானவன். (0 டிகிரியில் தண்ணீர் பனிக்கட்டியாகிவிடும்) வவ்வால்களின் வேறுபட்ட வெப்ப நிலையை தாங்கக்கூடிய இந்த உடலமைப்பு இறைவன் இவற்றிற்கு அளித்த அருட்கொடையாகும். இவைகளின் உடல் அமைப்பு மற்ற பாலூட்டிகளை ஒத்திருப்பினும் இவைகளின் முன்னங்கால்களின் அமைப்பே மற்றவற்றிலிருந்து மாறுப்பட்டதாகவும் இவற்றிற்கு பறப்பதற்கு உறுதுணையாகவும் அமைந்துள்ளன. இவற்றின் முன்னங்கால்களில் உள்ள விரல்களுக்கிடையே தோலினால் இடைவெளியின்றி பினைக்கப்பட்டுள்ளன. இந்த தோல் அமைப்பே இவற்றிற்கு பறவையின் சிறகினைப்போன்று அமைந்து இவைகள் பறக்க உதவுகின்றன. இவற்றின் விரல்களில் பிணைக்கப்பட்டுள்ள இந்த தோல் அமைப்பு இவற்றின் உடலின் பக்கத் தசையுடன் இணைக்கப்பட்டு பின்புற கால்களில் இணைக்காப்பட்டுள்ளன.

    “எதிரொலியின் மூலம் இரையை பிடிக்கும் அதிசியமான ஆற்றல்” ECHO LOCATION
    bat.ht1
    “ரேடாரின் இயக்கத்தை ஒத்த ஒலி அலை அமைப்பு”

    (1) முதல் படம் மாறுப்பட்ட அலை வரிசைகளைக்கொண்ட ஒலியை வவ்வால் அனுப்புகின்றது,
    (2) இரண்டாவது படம் அதனால் அனுப்பப்பட்ட ஒலிஅலையின் பாதையில் தடங்கள் ஏற்பட்டு அது எதிரொலியாக திரும்பி வருதல்.
    (3) ஒலிப்பாதையில் தடங்கள் ஏற்பட்ட இடத்தை நோக்கி துல்லியமாக இரையின் அளவையும் தொலைவையும் அறிய அனுப்பும் ஒலி.
    (4) இரையை விரைந்துச்சென்று பிடித்தல்.

    இன்றைய நவீன அறிவியல் கண்டுபிடிப்புக்களில் ஒன்றான ரேடாரின் இயக்கத்தை ஒத்த ஒரு இயக்கம்தான் வவ்வால் தனது இரையை அடைய மேற்கொள்ளும் உத்தியாகும். இந்த பண்புகளை தன்னிச்சையாக எவ்வாறு பெற்றிருக்க முடியும். இத்தகைய திட்டமிட்ட ஒரு செயல் அமைப்பு தன்னிச்சையாகவோ அல்லது வவ்வாலே சிந்தித்து இத்தகைய ஒரு ஏற்பாட்டை அமைத்துக்கொண்டதாகவும் நம்மால் எடுத்துக்கொள்ள முடியுமா?. ஒரு சட்டையின் பொத்தான் தானாகத் தோன்றியதாக சொன்னால் நம்ப நம் பகுத்தறிவு ஏற்க மறுக்கின்றது. ஆனால் கடவுள் மறுப்புக் கொள்கையை நிலைநாட்ட எத்தனிக்கக் கூடியவர்கள் இதற்கு எந்த ஏற்புடைய காரணத்தை சொல்லப்போகின்றார்கள். இனி எவ்வளவு காலம்தான் பரிணாம வளர்ச்சி தத்துவத்தை தூக்கி பிடிப்பார்கள். அமெரிக்க விஞ்ஞானி ஸ்பென்சர் வெல்ஸின் கண்டுபிடிப்புகளின் மூலம் புதைக்குழியை அடைந்த இவர்களுடைய இந்த தத்துவத்தை இனி எவ்வாறு இவர்கள் நியாயப்படுத்த முடியும். இனி எந்த புதிய தத்துவத்தை இறைவனை மறுக்க இவர்கள் தேடிக்கொண்டிருக்கின்றார்கள். இந்தப்பண்புகளை உடையவர்களைப்பற்றி அல்லாஹ் திருமறையில் பின்வருமாறு கூறுகின்றான்.

    ஷைத்தான் அவர்களை மிகைத்துவிட்டான் அல்லாஹ்வின் நினைவை அவர்களுக்கு மறக்கச்செய்தான். அவர்களோ ஷைத்தானின் கூட்டத்தினர். கவனத்தில் கொள்க ஷைத்தானின் கூட்டத்தினரே நஷ்டமடைந்கவர்கள்.(58:19)

    இவர்கள் அல்லாஹ்வுடைய ஜோதியை தங்கள் வாய்களினால் ஊதி அணைக்க நாடுகின்றனர். இருப்பினும் அல்லாஹ் இந்த நிராகரிப்பவர்கள் வெறுத்த போதிலும் தன் ஜோதியைப் பூர்த்தியாக்கி வைப்பான். (9:32)

    பொதுவாக வவ்வால்கள் எதிரொலிமூலம் தங்கள் இரையை பிடிப்பினும் கூட விதிவிலக்காக எதிரொலியின்றி கண் பார்வையைக்கொண்டு இரையைப்பிடிக்கக்கூடிய வவ்வால்களும் இருக்கின்றன. உதாரணமாக பிளையிங் பாக்ஸ் வவ்வால்கள் இவை மிக கூர்மையான பார்வை திறன் அமையப்பெற்றுள்ளன. இந்தத்தன்மை விதிவிலக்குகளில் விதிவிலக்கான அம்சமாகும்.

    “சுயம்வரம் நடத்தி ஆண் வவ்வால்களைத் தேர்வு செய்யும் பெண் வவ்வால்களின் வியப்பூட்டும் ஓர் அம்சம்”

    “ஆயிரக்கணக்கான குட்டிகளிடையே தன் குட்டியை மிகச்சரியாக அறியக்கூடிய நினைவாற்றல்”

    வவ்வால்களின் இனப்பெருக்கத்தை பொறுத்தவரை இனங்களுக்கு இனம் வேறுப்பட்டு காணப்படுகின்றது. பொதுவாக ஒரு முறைக்கு ஒரு குட்டிகளை மட்டும் ஈன்றெடுக்கின்றது. இவைகளின் கர்ப காலம் 40 நாட்கள் முதல் 8 மாதங்கள் வரை இனத்திற்கு இனம் வேறுபட்டுக் காணப்படுகின்றது. ஹாமர் ஹெட் வவ்வால்களின் இனப்பெருக்க முறை மிக வித்தியாசமானதாகும். இவ்வினத்தின் ஆண் வவ்வால்கள் நூற்றுக்கணக்கில் ஒரு மரத்தில் தொங்கிக்கொண்டு இருக்கும். இவைகள் பெண் வவ்வால்களைக் கவர வித்தியாசமான சப்தங்களை எழுப்புகின்றன. இதனால் கவரப்பட்ட பெண் வவ்வால்கள் அங்கு வருகைத்தருகின்றன. ஒவ்வொரு ஆண் வவ்வாலும் தான் தேர்வு செய்யபட முயற்ச்சிகளை மேற்கொள்ளுகின்றன. இருப்பினும் கூட அந்த நூற்றுக்கணக்கான வவ்வால்களில் ஒன்றினை மட்டும் தேர்வு செய்து இனப்பெருக்கத்தில் ஈடுபடும் இந்த நிகழ்ச்சி பழங்கால இளவரசிகள் சுயம்வரம் நடத்தி தங்களுக்கு பிடித்த ஆண்களை தேர்வு செய்த சம்பவத்தைதான் நமக்கு நினைவுபடுத்துகின்றது. இனப்பெருக்கத்தின் மூலம் கர்பமடையும் பெண் வவ்வால் குட்டிகளை ஈன்றெடுக்க இடம் பெயர்ந்து இதைவிட வெப்பமான இடத்தில் சென்று மற்ற கர்பமுள்ள வவ்வால்களுடன் சேர்ந்துக்கொள்ளுகின்றன. ஆயிரக்கணக்கான வவ்வால்களின் குட்டிகளுக்கிடையே இவை தங்கள் குட்டியை மிக சரியாக அடையாலம் கண்டுகொள்ளும் இந்த ஆற்றல் மனித இனம் கூட அடையாத ஒன்றாகும். மருத்துவ மனைகளில் குழந்தை பிறந்தவுடன் அடையால அட்டை கட்டாவிட்டால் எந்த தாயும் தன் குழந்தையை அறிய முடியாது எல்லோரும் அறிந்த ஒன்றுதான்.

    அழிவின் விளிம்பை நோக்கிச் செல்லும் வவ்வால்கள். ஓர் அதிர்ச்சி தகவல்

    வவ்வால்களில் சில வகைகள் 30 ஆண்டுகளுக்கு மேலாக உயிர் வாழுகின்றன. இன்றைய சூழ்நிலையில் காடுகள் பெருவாரியாக அழிக்கப்படுவதாலும் உலக அளவில் தற்போது ஏற்பட்டுள்ள (Elnino) பருவநிலைக்கோளாறுகளினால் கோடிக்கணக்கான ஹெக்டேர்களில் ஏறபடும் காட்டுத்தீயினாலும் மிக வேகமாக வவ்வால் இனங்கள் அழிவை நோக்கி சென்றுக்கொண்டிருக்கின்றன. மெக்ஸிகோவில் ஏற்ப்பட்ட காட்டுத்தீயின் காரணமாக சில வவ்வால் இனங்கள் 99.99 சதவிகிதம் அழிந்துவிட்டதாக கருதப்படுகின்றது. மனிதர்களினால் வவ்வால்களுக்கு பெரிய அளவில் எந்த பிரச்சனையும் ஏற்படாவிட்டாலும் கூட சில வேளைகளில் உண்பதற்காகவும் சோதனைச்சாலைகளில் ஆராயச்சி செய்வதற்காகவும் இவை வேட்டையாடப்படுகின்றன.

    இந்த சிரிய உயிரினத்தில்தான் இறைவன் எவ்வளவு அத்தாட்சிகளையும் அதிசயமான பண்புகளையும் வைத்து நம்மை சிந்தனை வயப்படுத்தி பிரமிக்க வைத்துவிட்டான். இதைக்காட்டிலும் பல பிரமாண்டங்களை படைத்துள்ள இறைவன் அனைத்தின் மீதும் ஆற்றல் நிறைந்தவன்.

    நீங்கள் பார்க்கக்கூடிய தூண்கள் எதுவுமின்றி வானத்தைப் படைத்தான். நீங்கள் சாய்ந்து விடாதிருக்கும் பொருட்டு முளைகளை (மலைகளை)நாட்டினான். அதில் ஒவ்வொரு உயிரினத்தையும் பரவச்செய்தான். வானத்திலிருந்து தண்ணீரை (நாமே) இறக்கினோம். அதில் மதிப்பு மிக்க ஒவ்வொன்றையும் முளைக்கச் செய்தோம் (31:10)

    ஆதாரங்கள்:

    கலைக்களஞ்சியம், என்கார்டா என்சைக்ளோபீடியா, டேஞ்சர் கிரியேச்சர்ஸ்
    by: E. உஸ்மான் அலி
    Source :http://www.islamkalvi.com/?p=4212

     
  • Tags: , ,

    உழைத்தே என்னை உயர்த்தியவர் !

    10468684_686195874785111_91259844948093480_nஉழைத்தே என்னை உயர்த்தியவர் !
    இன்றும் உழைக்கிறார் ,,,,
    தந்தையின் உழைப்பையும்,
    உணர்ந்து இன்று நானும்,,,
    உழைக்கிறேன்,
    நான்-
    “அப்பா என்னால முடியில அப்பா ”
    அப்பா –
    “சாமி வேனாம்பா நீ போ சாமி ! அதுக்காகத்தான சாமி உன்னைய படிக்கவச்சேன்”

  • நான்-
    “அப்பா இப்போதுதான் நல்லாருக்கமே அப்புறம் ஏன் ? நீங்க இன்னும் உழைக்கனும் ?”
    அப்பா-
    “நான் உழைக்கலனா இருக்கமாட்டேன் சாமி ”

    அப்படியே அவருக்கு தெரியாமல் அழுதுவிட்டேன் அதையும் அறிந்து “என்ன சாமி கண்ணுல தன்னி ? ” என்ற அவரே ஏதும் தூசி பட்டுருச்சான்னு கேட்டுக்கொண்டு கண்ணில் ஊதிவிட்டபோது கண்ணீரும் கதறி ஓடியது !
    அப்பா ,, அப்பா ,, அப்பாதான் !
    1554462_677177999020232_5383148709311809901_nSathiyananthan Subramaniyan Banumathi

     
  • Tags: